LAOAG CITY – Nangipasa ti resolusion ti Sangguniang Panlungsod ditoy siudad ti Laoag para iti naan-anay a pannakaberipikar ti pakasaritan ti nagan ti Aurora Park iti National Historical Commision of the Philippines.
Inbatad ni Vice Mayor Rey Carlo Fariñas a gagem ti nasao a resolusion a kumpirmaran no pudno nga Aurora Park ti orihinal a nagan ti freedom park iti siudad.
Segun kenkuana, a basar ti panagsukisokna ket naduktalanna dagiti impormasion a Plaza de Alfonso XII ti orihinal a nagan kas pannagbigbig iti pannakapaisardeng ti tobacco monopoly.
Naamoan na pay a ti nasao a park ket inawagan laeng dagiti Amerikano nga Aurora Park gapu ta kayatda a punasen ti imahe ti Spanish colonization ditoy siudad.
Innayonna a kalikagumna a kumpirmaran daytoy iti National Historical Commision of the Philippines no legal met laeng daytoy.
Kabayatanna, kunana a no masukatan ti nagan ti maysa a lugar ket rumbeng laeng a dumalan iti Kongreso ditoy pagilian.
