LAOAG CITY – Nakasaganan dagiti nagduduma a senador ti pannakapatungpal ti overtime para iti impeachment trial ni Bise Presidente Sara Duterte.
Basar ken ni Senador Panfilo Lacson a kaadoan iti majority bloc ti nakasaganan nga ipatungpal ti regular session iti bigat kabayatan ti impeachment ket maiyuswat iti malem agingga rabii.
Mainaig iti daytoy, manipud iti dati nga oras nga alas-10 ti bigat agingga alas-2:30 ti malem, planoda a baliwan ti oras ti alas-2:30 ti malem agingga alas-7:30 ti rabii.
Kunana pay a mabalinda pay nga umabot iti alas-11 ti rabii agingga tengnga ti rabii tapno masurot ti nagtulagan a maysa a witness iti kada aldaw.
Ti nasao a baro nga schedule ket mabalin nga ipatungpal inton sumaruno a lawas tapno magundawayan a tingitingingen dagiti senador dagiti witness.
Maipalagip a maputputed ti impeachment hearing ti alas-3 ti malem tapno magundawayan ti regular session-da.
Inbatadna a umanamong pay dagiti minority senators iti nadakamat nga ideya.
Inlawlawag ni Lacson a ti baro nga schedule ket mabalin a mabaliwan depende iti sasaaden.
Kabayatanna,manamnama ti anunsio ti baro nga oras ti impeachment trial inton Lunes, Agosto 24 wenno Mierkules, Agosto 26.
