LAOAG CITY – Nirugyananen ti Quiapo church ti security planning para iti panagsaganada iti Nazareno 2027.
Basar ken ni Fr. Ramon Jade Licuanan, parish priest ti Quiapo Church, a napasapa ti panagsagana gapu ti manamnama a million a deboto ti makipaset inton sumaruno a tawen.
Kunana a napateg a planoen a nalaing ti security, crowd control ken logistic concerns gapu iti kinaadu a tao a makipaset ken ti kinailet a kalsada iti Manila.
Naikeddeng pay a mangrugi ti pannakitaripnongda kadagiti polis, military ken dagiti opisial ti Malacañang sakbay ti Nazareno 2027.
Innallukoyna pay dagiti diocese iti intero a pagilian a mangiyuswat ti lokal a selebrasion iti babaen ti “Dalaw Nazareno” program.
Iti nasao a wagas ket makatulong a makontrol ti bilang ti tao ken mai-promote ti ad-adda a napalawa a devotion.
Ti tema ti 2027 Nazareno ket “Tuwirin ninyo ang daraanan ng Panginoon.”
Maipagalip nga immabot ti 31 nga oras ti Nazareno 2026 ken nabigbig kas kaatiddugan a Translacion iti pakasaritaan iti pagilian.
