LAOAG CITY – Napan inserbi ti Philippine National Police ti search warrant iti maysa a pagtaengan iti Barangay Medina iti ili ti Dingras.
Ti akinkukua iti nasao a balay ket agtawen ti 44 a lalaki, negosyante ken residente metlaeng iti nadakamat a barangay.
Basar iti Philippine National Police, awan ti akinbalay iti panangiserbi da ti search warrant nga inparuk-at ti Presiding Judge of the 1st Judicial Region, Branch 4, Family Court ti Regional Trial Court (RTC), Laoag City, gapu iti panaglabsing ti Republic Act No. 10591 wenno Comprehensive Firearms and Ammunition Regulation Act.
Nupay kasta, intuloy latta dagiti otoridad ti nagsukimat babaen ti presensya ti kabsat ti agtagikua iti balay ken dagiti opisyal ti barangay no sadinno a nakakumpiskar da ti maysa a magazine para iti caliber 45; 50 a balapara iti caliber 45; maysa a granada, uppat a bala para iti caliber 38, ken dua a bala para iti caliber 22 a paltog.
Malaksid kadagitoy ket nakakumpskar pay dagiti otoridad ti maysa a lighter nga addaan ti aluminum foil; maysa a plastic straw; maysa a pack ti plastic sachets; dua nga improvised shovel; maysa a black pouch; dua a dakkel nga Heat-Sealed plastic sachet a naglaon ti maipagarop a shabu; maysa a glass tooter; maysa a bassit a plastic spoon ken maysa a bassit a kutsilyo.
Manamnama ti pannakaiparuk-at ti warrant of arrest para iti pannakaarestar ti akinkukua iti balay a nakakumpiskaran dagiti nasao nga ebidensya.
