LAOAG CITY – Nagpirma ni Presidente Ferdinand “Bongbong” Marcos Jr. iti executive order a gagaemna a mangkapital kadagiti kritikal a mineral ti pagilian.
Segun iti Department of Environment and Natural Resources (DENR), itay nabiit, pinirmaan ni Marcos ti Executive Order No. 122 a mangiduron iti Unified National Policy Framework for Developing the Critical Minerals Industry.
Basar iti pammilin, addaan ti pagilian iti di kumurang a 9 a milion nga ektaria a manamnama a lugar a makaiggem iti nadumaduma a resources ti mineral tapno maikabil ti Pilipinas iti global value chain para kadagiti kritikal a mineral.
Iti babaen ti EO, ipatungpal ti DENR ti nasional a programa ti panagsukisok ken reserbasion ti mineral tapno mailasin ken matingiting dagiti baro a kritikal a deposito ti mineral, nangruna dagiti kasapulan para iti nadalus nga enerhia, digital a panagbalbaliw, ken panagdur-as ti imprastruktura.
