LAOAG CITY – Kwinestionaran ni Senator-Judge Risa Hontiveros ti dati nga Special Disbursing Officer (SDO) ti Office of the Vice President (OVP) a ni Gina Acosta mainaig iti maysa a maipagarup nakaawat ti confidential funds a “Clarisse Hontiveros.”
Inaramid ni Hontiveros ti clarificatory question iti Senate impeachment trial ita nga aldaw, Agosto 24, 2026 no sadinno ket napansin ti Senadora ti aldaw ti maipagarup pannakaawat ti confidential funds ni ‘Clarisse Hontiveros,” idi Pebrero 24, 2023 – aldaw ti panagkasangay ni Senador Hontiveros.
Sinaludsodna ni Acosta ti maibagana mainaig kadaytoy.
Segun ken ni Acosta, adda dagiti nagan ti recipient a datina a binerepika ken ni dati a Vice Presidential Security and Protection Group (VPSG) head Col. Raymund Dante Lachica.
Nupay kasta, inbatad ni Lachica kenkuana a confidfdential ti nasao nga impormasion.
Inlawlawag ni Acosta a saanna a personal nga ammo no adda pakainaigan ni “Clarisse Hontiveros” ken ni Senator Hontiveros ken ti rason ti aldaw a Pebrero 24, 2023 a nairekord nga aldaw a pannakaawat ti pondo.
Inbatad ni Acosta nga awan ti impormasionna no kasano a maipatpatungpal dagiti confidential activities.
Iti baet daytoy, inadmitir ni Acosta a kas Special Disbursing Officer (SDO), mabalin nga isuna ti maipilaan ti reklamo no mapaneknekan nga adda panaglabsing iti panagusar ti confidential funds ngem inpettengna nga ammo ni Vice President Sara dagiti araramidenna mainaig kadagiti confidential activities.
