LAOAG CITY – Naragsak nga inpakaammo ni Barangay Chairman Adel Boy Quinto iti Barangay 60-A, Caoacan ditoy ciudad iti Laoag a naikkaten dagiti naruay a waterlily iti karayan a sakupen ti barangay da babaen ti panagtitinnulong da a bumarangay.
Inbatad na nga iti pannakaikkat dagiti waterlily ket derderetson ti panagayus ti danom iti karayan.
Inpasingked ni Quinto a monitor da a kanayun ti karayan babaen ti tulong dagiti kabarangayan na tapno maikkat a dagus dagiti agtaod a waterlily.
Innayon na a napateg a mawaknitan ti karayan manipod kadagiti waterlily gapu ta no saan nga agayos a naimbag ti danom ket maummong daytoy ken mangitunda iti pannakalayos iti sentro ditoy ciudad ti Laoag.
Kabayatanna, inrakurak ni Barangay Chairman Quinto nga agarop makabolanen a saan a makapan agkalap iti baybay dagiti kabarangayan na gapu iti dakes a paniempo.
Inlawlawag na a ti laengen ar-aramiden dagiti kabarangayan na ket ti agliwliw iti igid ti karayan, a no adda ti maala da ket isu ti sidaen wenno ilako da no adda ti mayat a gumatang.
Mangnamnama ti kapitan a maipaayan ti tulong dagiti kalugaran na a mangngalap aglalo ket ti laeng panagkalap ti kangrunaan a pamastrekan da.
