LAOAG CITY – Inadmitir ni Office of the Vice President (OVP) Assistant Chief of Staff Lemuel Ortonio iti Senate Impeachment Court nga awan ti resibo dagiti naipaayan ti confidential funds ken saanda a nagsaludsod maipapan iti pannakaaramat ti pondo.
Kabayatan ti direct examination ni Atty. Mae Divinagracia ti prosecution team, kinuna ni Ortonio a saan nga inaramid ti Office of the Vice President (OVP) ti aktual a procurement.
Mainaig iti daytoy, nagpannuray ti Office of the Vice President (OVP) kadagiti field operatives ken informants a gumatang kadagiti medical ken food supplies para iti pannakaisayangkat dagiti confidential activities.
Sinaludsod pay ni presiding officer Chiz Escudero ni Ortonio no direkta a naited ti sonfidential funds kadagiti immawat ket nabaybay-an nga usarenda daytoy gapu ta naibilin kenkuada a gumatangda iti taraon wenno agas.
Pinasingkedan ni Ortonio a kastoy ti napasamak ken daytoy met ti impormasyon nga inted kadakuada ti security officer da.
Malaksid iti daytoy, awan pay ti resibo iti panaggatang kadagiti lamisaan ken tugaw ken nabayadan dagiti impormer iti kuarta tapno makagatangda iti kasapulanda.
Karaman kadagiti nagan dagiti impormer a naipaayan iti confidential funds nga awan ti opisial a resibo ket isuda da Miggy Mango, Mary Grace Piattos, Xuniso P. Belat, Timon Andrew Pusa, Antonio Pagong ken Beverly Pampano a nakaawat iti P50,000 agingga iti P130,000.
