LAOAG CITY – Kinumpirmaran ni Office of the Vice President Assistant Chief of Staff Lemuel Ortonio nga isuna ti adda iti likudan ti pannakaiparuk-at, panagusar ken liquidation ti pondo ti Office of the Vice President (OVP) ni Vice President Sara Duterte.
Iti maika-18 nga aldaw ti impeachment trial ni Duterte ita nga aldaw, Agosto 25, 2026, inbatad ni Ortonio nga awan ti confidential funds ti Office of the Vice President OVP idi nagtugaw ken simmublat ni Duterte iti puesto idi Hulio 2022, ken maipagarup awan pay ti confidential funds idi panawen ni dati a Vice President Leni Robredo.
Gapu iti daytoy, kiniddaw ti Office of the Vice President OVP ti confidential funds iti Department of Budget and Management (DBM) babaen ti maysa a surat idi Agosto 22, 2022. Segun ken ni Ortonio, ni Duterte ti nangibaga ti eksakto a gatad a kiniddawda.
Mainaig iti daytoy, impakita ti prosekusion ti nasao a surat a maipagarup awan ti computation wenno attachments-na. Naipakita pay ti Physical and Financial Plan (PFP) iti aldaw ti Setiembre 16, 2022 – nganngani maysa a bulan kalpasan ti request iti Department of Budget and Management (DBM) no sadinno ket kinumpirmaran ni Ortonio a saan a dimmalan iti opisinada ti Physical and Financial Plan (PFP).
Segun ken ni Ortonio, ti confidential funds ket nakiddaw para iti natalged a pannakaipatungpal dagiti aktibidad ti Good Governance Program ken para iti official engagement iti uneg ken ruar ti pagilian.
Kabayatanna, inbilangda a “hostile witness” ti impeachment trial presiding officer ni Ortonio kalpasan a kwinestionaran ti prosekusion dagiti sumagmamano a rakurakna.
Inawagan met ti defense panel a “theories” ken “sound bites” laeng dagiti inlanad ti prosekusion mainaig iti confidential funds ti Office of the Vice President (OVP).
