LAOAG CITY – Silulukat ni Pres. Ferdinand Marcos Jr. iti posibilidad nga ipawil ti Facebook ken sumagmamano nga online games ditoy Pilipinas.
Daytoy ket kalpasan ti rekomendasyon ti Cybercrime Investigation and Coordinating Center (CICC) nga i-ban ti Facebook gapu iti panagraira iti misinformation ken tapno masalakniban dagiti agtutubo kontra iti panagabuso.
Segun ken ni Palace Press Officer Usec. Claire Castro, silulukat ti presidente iti panangikkat ti aniaman a mabalin a pakaisagmakan dagiti agtutubo.
Nupay kasta, kuna ti Malakanyang a kasapulan pay a maadal no pudno a makatulong ti panangipawil iti pananglapped ti fake news ken dadduma pay a peggad gapu iti social media ken online gaming platforms.
