LAOAG CITY – Agtultuloy ti panangtingiting ti Department of Justice (DOJ) ti kiddaw ti gobierno ti Estados Unidos nga i-extradite ni Kingdom of Jesus Christ leader Apollo Quiboloy.
Inbatad ni Palace press officer Claire Castro a naruay ken binulto dagiti dokumento a kasapulan nga adalen ti Department of Justice sakbay a makaipaay ti rekomendasyon iti isyu.
Maysa kadagiti tingtingitingen ti Department of Justice ket no maipatpatungpal ti “double criminality” principle, wenno no dagiti kaso a sangsangwen ni Quiboloy iti Estados Unidos ket maibilang met a krimen iti babaen ti linteg iti Pilipinas.
Immunan nga inbatad ti Malacañang a ni Presidente Ferdinand Marcos Jr. ti agdesisyon iti agbalin a gasat ni Quiboloy kalpasan ti panangtingiting ti Department of Justice ti extradition request.
Segun ken ni Castro, ammo ti Department of Justice a masapol a maaddaan ti desisyon iti kabiitan a panawen, ngem kasapulan paylaeng ti naiget a panangadal kadagiti dokumento.
Maipalagip a ni Quiboloy ket sumangsango iti qualified human trafficking case iti Pasig Regional Trial Court (RTC) ken sabali pay a kaso ti sexual abuse ken maltreatment iti Quezon City RTC.
