LAOAG CITY – Inbatad ti Department of Health (DOH) a nakasagana daytoy iti possible a panagado ti kaso ti dengue ita a panawen ti tudtudo.
Segun ken ni Department of Health Secretary Edwin Mercado, umaboten iti nasurok a 111,000 a kaso ti dengue ti nairekord iti pagilian ita a tawen.
Nupay kasta, 27 a porsiento a nababbaba daytoy no ikompara iti nairekord a kaso iti kapada a panawen iti napalabas a tawen.
Inbatad ni Mercado a nangilatangen ti Department of Health ti umdas a suplay para kadagiti pasyente a naapektaran ti dengue, karaman dagiti kasapulan ti blood banks ken laboratory testing.
Ti dengue ket maysa a viral infection a maipasa iti kagat ti infected a lamok ken naipagagangay daytoy a sakit kadagiti pagilian a tropikal kas ti Pilipinas, ngem awan pay ti partikular nga agas kontra iti nasao a sakit.
