LAOAG CITY – Kiniddaw ti Office of the Ombudsman nga ag-inhibit ni Sandiganbayan Associate Justice Ronald Moreno iti panagdengngeg ti malversation case kontra ken ni dati a Sen. Ramon “Bong” Revilla Jr. mainaig ti maipagarop a ghost flood control project iti Pandi, Bulacan.
Iti 69 a pinanid a motion nga inpila iti Office of the Special Prosecutor, inpetteng ti prosekusyon a maipagarop nga adda dagiti gundaway iti bail hearings a dagiti rakurak ken panagsaludsud ni Moreno kadagiti testigo ket mabalin a mangipaay ti impresyon ti panangkanunong.
Partikular a kwinestyun ti Ombudsman prosecutors ti nagbalin a maipagarop a panangtrato ni Moreno kada state witnesses Henry Alcantara ken dati a Public Works Undersecretary Roberto Bernardo.
Basar iti prosekusyon, saanda a kwestyunaran ti integridad, kabaelan wenno good faith ni Moreno, ngem inpetteng da a napateg met nga awan ti nainkalintegan a panagdudua ti panagbalin a patas ti maysa a korte kabayatan ti pannakadengngeg ti kaso.
Ni Moreno ket maysa iti dua a mahistrado ti Sandiganbayan Third Division a nagbotos pabor iti pannakaipalubos nga agpiyansa ni Revilla.
Iti 2-1 ruling, napalubusan ti dati a senador nga agpiyansa ti P1 milyon kalpasan nga inrakurak ti mayorya a saan nga umdas dagiti inpakita nga ebidensya ti prosekusyon iti bail proceedings tapno direkta a maikonektar ni Revilla iti nasao a proyekto.
Addan iti Sandiganbayan ti desisyon no patgan na ti mosyon ti Ombudsman nga ag-inhibit ni Moreno iti panangdengngeg ti kaso ni Revilla.
