LAOAG CITY – Silulukat ni Presidente Ferdinand R. Marcos Jr. a mangipakat iti naig-iget a pannusa iti illegal a panagikut iti loose firearms kalpasan ti makapapatay nga insidente ti panagpaltog iti uneg ti pagadalan a nakairamanan dagiti menor de edad.
Inladawan ni Presidential Communications Office (PCO) Undersecretary ken Palace Press Officer Claire Castro a “good” ti panangiduron ni Department of the Interior and Local Government (DILG) Secretary Jonvic Remulla a pagbalinen a non-bailable offense ti illegal a panagikut iti loose firearms ken maipataw ti agingga iti 20 a tawen a pannakaibalud.
Innayonna pay nga impasimudaag ni Castro a saan a kontraen ni Presidente Marcos ti addang a nairanta a mangsalaknib iti publiko.
Nupay kasta, kasapulan a naan-anay a repasuen ti Presidente ti naisingasing a linteg ken dagiti kangrunaan a probisionna sakbay nga agtakder iti daytoy a banag.
