LAOAG CITY – Ilepleppasen ni Senador Erwin Tulfo ti inlungalong na a gakat a gagem na a mapatawan ti minilyon a pisos a multa ken possible a pannakaibalud dagiti opisyal ti social media platforms nga agtultuloy a mangipatpatungpal ti bukod da a community standards kontra kadagiti graphic ken nadamsak a linaon na.
Segun ken ni Tulfo, masapol nga adda ti milyones ti maipataw a multa gapu ta dadakkel a kumpanya ti karaman, idinto mabalin met nga agsungbat ken mabalud dagiti opisyal da no maulit-ulit dagiti panaglabsing iti kada insidente.
Adda ti 18 a senador ti mapagarop a nangirakurak ti suporta na iti nasao a gakat.
Inlungalong daytoy ni Senador Tulfo tapno masolusyunan ti alisto a panagwaras iti internet dagiti nadamsak ken graphic a ladawan dagiti biktima manipod kadagiti napalabas a pammaltog iti Ateneo de Zamboanga University ken San Jose National High School iti Tacloban City.
Inlawlawag ti senador a saan a gagem ti gakat a lapdan ti freedom of expression wenno freedom of information, imbes ket kalikagom na laeng a protehiran ti dignidad ken privacy dagiti biktima, ti bukod da a pamilya, ken ti dadduma pay a karaman manipod kadagiti nadamsak a ladawan ken video.
Iti agdama, agtultuloy nga ad-adalen dagiti agpanpanday linteg no ania nga ahensya ti gobierno ti rumbeng a maaddaan ti hurisdiksyon iti panangipatungpal kadagiti pannusa ken regulasyon kadagiti online platform.
