LAOAG CITY – Pormalen a naipila iti kamara de representantes ti P7.2-trilyon General Appropriations Bill (GAB) para iti 2027, ti kadakkelan a nailungalong a national budget iti pakasaritaan ti pagilian.
Inpila ni House Committee on Appropriations chairperson ken Nueva Ecija 1st District Rep. Mikaela Angela “Mika” Suansing ti House Bill No. 10858.
Ti nailungalong a gakat ket naibasar iti P7.2-trilyon a National Expenditure Program (NEP) nga insumitir ti Department of Budget and Management (DBM) iti Kongreso idi Agosto 11.
Kadakkelan a paset ti proposed budget ket nailatang iti Department of Education nga addaan ti P976 bilyon, idinto a P644 bilyon met ti maikabil iti Department of Public Works and Highways.
Adda met ti P353.8 bilyon manipod iti nailungalong a pondo ti para iti health sector, karaman ti Department of Health, specialty hospitals ken PhilHealth.
Karaman pay dagiti dadakkel nga allocations ti P332.5 bilyon para iti Department of the Interior and Local Government, P328.8 bilyon para iti Department of National Defense, P302.2 bilyon para iti transport sector ken P261.7 bilyon para iti agriculture sector.
Agtultuloy ti panangtingiting ti House Committee on Appropriations ti nailungalong a pondo ti kada ahensya sakbay nga ikabil ti General Appropriations Bill iti plenaryo para iti deliberasyon ken pannakaaprubar na.
