LAOAG CITY – Nakwestionaran ni Ombudsman Jesus Crispin Remulla ti maipagarup a panang-personalna iti kaso kontra ken ni Romualdez, iti baet ti kinaawan ebidensia ti flood control mess.
Iti interview ni Atty. Antonio Bucoy, pagduduaanna no apay a pursigido pay laeng ni Remulla a mangipila iti kaso kontra ken ni Romualdez nupay awan ti pammaneknek. Para iti abogado, kasla personal nga interes ti Ombudsman daytoy.
Innayon ni Bucoy nga awan ti kontraktor wenno opisial ti Department of Public Works and Highways (DPWH) a pakairamanan dagiti whistle-blowers, engineers ti distrito ti Bulacan, Usec. Roberto Bernardo, ken dati a Secretary Manuel Bonoan ti nanginaig ken ni Romualdez iti kontrobersia.
Segun kenni Bucoy, agparang nga adda personal a motibo ni Remulla kontra iti dati a lider ti Kamara.
Binabalawna pay ti “prejudgment” ti Ombudsman idi inawaganna ni Romualdez a mastermind sakbay pay a nalpas ti umuna nga imbestigasion.
Kwinestionaran pay ni Bucoy ti kellaat a panagibaga ti Ombudsman nga addaanda iti 28 a saksi, a kunana a mapagduaduaan a maitunos iti imbaga ni abogado Levito Baligod nga addaanda iti 18 a baro a saksi.
Kabayatanna, kunana a no mangipila ti Ombudsman iti kaso nupay awan ti pammaneknek, impetteng ni Bucoy a rumbeng a dismiss ti korte.
