LAOAG CITY – Innem a katutubo ti natay idinto a tallo a sabsabali dagiti mapukpukaw kalpasan a naarinebneb ti nagluganan da a maysa a motorized banca iti Lake Mapanuepe, Barangay Buhawen, San Marcelino, Zambales.
Segun ken ni Zambales Provincial Director Col. Benjamin Ariola, napasamak ti trahedya pasado alas-2 ti malem idi kalman, Agosto 27 ngem alas-3:40 ti malemen a naireport daytoy ti MDRRMO San Marcelino.
Dagus da a nangiyuswat ti search and retrieval operation kadwa da ti BFP ken dagiti operatiba ti 2nd PMFC.
Uppat kadagiti nakalugan ti bangka ti nakalasat.
Naisardeng ti operasyon iti oras ti alas-6:45 ti rabii gapu iti dakes a sasaaden ti panawen.
Basar iti report, agturong iti Sitio Lumibao manipod iti Buhawen Proper dagiti biktima idi naaddaan ti aberya ti nagluganan da a motorized banca iti Lake Mapanuepe.
Possible nga overloading ti makaigapu ti pannakaarinebneb ti bangka.
Naamoan a dagiti katutubo ket kagapgapu da laeng iti health center para iti vaccination.
