LAOAG CITY – Rugyanen ti National Food Authority (NFA) ti aggatang ti fresh ken wet palay iti nangatngato a presyo apaman a madanun ti bolan ti Setyembre.
Segun ken ni NFA Administrator Larry Lacson, namnamaen a dumakkel ti mapastrek dagiti lokal a mannalon iti kanito a maipatungpal ti baro a presyo, a mairana pay iti panawen ti panagapit iti pagilian.
Manipod iti agdama a P17 ti kada kilo, ipangaton ti ahensya ti buying price ti wet palay iti P21 ti kada kilo.
Kayatna a sawen ket manayunan ti P4 ti kada kilo iti mapastrek ken pakairanudan ti kada mannalon.
Nupay kasta, inlawlawag ni Lacson a limitado paylaeng daytoy a programa kadagiti lugar nga addaan ti bukod a rice drying facilities ti National Food Authority.
Inlawlawag ti opisyal a napateg dagiti nasao a pasilidad tapno dagus a mapamaga dagiti magatang nga irik ken maliklikan ti pannakadadael wenno pannakalungsot dagitoy kabayatan a nakapenpen da kadagiti bodega ti ahensya.
