LAOAG CITY – Natay ti maysa a lalaki idinto nasugatan ti nobya na kalpasan a napaltugan da iti Brgy. Uguis iti ili ti Nueva Era.
Ti biktima ket agtawen ti 25, baro, college student ken residente iti Barangay Uguis iti nasao nga ili.
Iti imbestigasyon ti Philippine National Police iti ili ti Nueva Era, iti oras ti alas-7:30 ti rabii, kabayatan ti isasangpet iti balay da ti biktima a nakalugan ti motorsiklo kadwa na ti girlfriend na nga agtawen ti 21, college student ken taga Barangay Bayog iti ili ti Burgos, ket bigla lattan a pinaltugan ti suspek a nakalugan metlaeng ti motorsiklo dagiti biktima.
Nagsagaba ti lalaki a biktima ti sumagmamano a sugat iti nagduduma a paset ti bagina, karaman iti barukong na idinto a ti babai ket nasugatan met ti buksit na.
Naitaray a dagus ti lalaki a biktima iti Nueva Era Rural Health Unit ngem naideklarar a pimmusayen gapu kadagiti sinagaba na a nakana a sugat idinto a naikabil iti Ilocos Sur District Hospital iti Sinait, Ilocos Sur ti nobya na, nga ita ket addan iti stable a kasasaad ngem agtultuloy paylaeng a maob-obserbaran.
Narekobre dagiti otoridad iti nakapasamakan ti krimen ti uppat a fire cartridges ti 9mm.
Mainaig iti daytoy, iti naiyuswat nga hot pursuit operation ket naarestar dagiti otoridad ti suspek nga agtawen ti 19, awanan ti asawa ken residente metlaeng iti Barangay Uguis iti ili ti Nueva Era.
Rumrumuar a ti motibo iti napasamak a pammaltog ket ti dati a susik iti nagbaetan ti suspek ken biktima.
Iti agdama, nagtalinaed iti Philippine National Police iti ili ti Nueva Era ti suspek ken maisagsaganan ti kaso a murder ken attempted murder a maipila kontra kenkuana.
