LAOAG CITY – Nagpalagip ni Dr. Samantha Licudine, ti mangidadaulo iti City Veterinary Office ditoy siudad ti Laoag kadagiti livestock raisers iti pannakatagiben a naimbag kadagiti tarakenda nga ayop.
Inbatad na a masapol nga addaan da iti usto a pagnaedan ken iti kanen tapno saan da nga agsakit wenno matay.
Segun kenkuana, ado dagiti agbalbalin a sakit dagiti livestock animal iti agdama aglalo ita a panawen ti panagtutudo kas iti foot run wenno iti kaada iti infection.
Nupay kasta, kunana a tapno maliklikan iti pannakatay dagiti livestock animal kas iti baka, kalding ken dadduma pay ket ugalien a kitaen iti pagsayaatan dagitoy.
Kabayatanna, kuna ni Licudine a mangipapaay dagitoy ti libre a bitamina, bakuna ken purga tapno maiyadayo dagiti taraken nga ayop iti aniaman a sakit.
Innayon na a no adda iti sakit dagiti taraken ket mabalin da a tawagan iti opisina da tapno maasistiran ken matulungan iti pannakataming dagitoy.
