LAOAG CITY – Awan ti makita ti Malacañang a problema iti confidentiality dagiti impormer iti naiplano a panagbalbaliw iti pannakaaramat ti kompidensial ken intelligence funds.
Segun kenni Palace Press Officer Undersecretary Claire Castro, adda polisia ti Commission on Audit (COA) a mangsalaknib iti kinasiasino dagiti impormer a mabalin a mairaman iti imbestigasion.
Kinunana a nalawag ti nakapalaon iti Joint Memorandum Circular 2015-01 a saan koma a maibutaktak ti kinasiasino dagiti impormer.
Segun iti polisia, dagiti mangsuporta a dokumento ket masapul a maikabil kadagiti naselioan a sobre ken maidulin iti vault ti ahensia.
No laeng adda saludsod maipapan iti pannakausar ti pondo a mairuar dagiti dokumento.
