LAOAG CITY – Saan a mapagsasaritaan iti Malacañang ti pannakaipaay ti fuel subsidy kadagiti pribado a motorista wenno dagiti adda iti middle-income class.
Daytoy ti inlawlawag ti Palasio kalpasan a napagsaludsodan no karaman met dagiti pribado a motorista iti nasao a programa, kalpasan ti panangibatad ti administrasion a ipamaysana ti kasapulan dagiti middle-income a Pilipino bayat ti nabatbati a termino ni Presidente Ferdinand Marcos Jr.
Segun kenni Palace Press Officer Usec. Atty. Claire Castro, ad-adalen pay laeng ti administrasion dagiti nadumaduma a programa tapno matulongan dagiti Pilipino a naapektaran iti nangato a presio ti lana ken basic commodities gapu iti agtultuloy a rinnupak iti Middle East.
Karaman kadagiti umuna a singasing ket ti income tax exemption.
Nupay kasta, kinuna ni Castro a saan pay a mapagsasaritaan ti fuel subsidy para iti middle-income class.
Iti agdama, ti subsidy iti gasolina para kadagiti drayber ti jeepney ken UV Express ket ₱12 iti kada litro.
