LAOAG CITY – Impakaammo ni Ms. Perlita Cabello, mangidaulo ti City Social Welfare and Development Office (CSWDO) nga agtultuloy ti panag-monitor da kadagiti agkaraiwara a Badjao ditoy siudad ti Laoag.
Daytoy ket iti pannakitinnulong da iti City Disaster Risk Reduction and Management Office (CDRRMO).
Inbatad ni Cabello nga agsisinublat dagiti personnel iti panag-monitor tapno masigurado a regular ti pannakakita ti kasasaad dagiti nasao nga indibidual, nangruna iti rabii.
Mainaig iti daytoy, kunana a naiget ti pannakamonitor kadagiti lugar a masansan nga ayan da pakairamanan ti paset dagiti fast food chain tapno maamoan ti kasapulan ken sitwasion dagiti nasao a Badjao.
Innayon pay ni Cabello a delikado ti trabaho dagiti personnel, isu a masapul ti pannakaurnos ti duty ken pannakitinnulong dagiti ahensia iti naan-anay a pannnaka-monitor dagiti nasao nga indibidual.
