LAOAG CITY – Mamati ni Deputy Speaker ken La Union Rep. Paolo Ortega V a ti testimonya dagiti opisyal ti Armed Forces of the Philippines (AFP) ti mangkumpleto iti istorya no kasanu a nausar iti confidential funds ni Vice President Sara Duterte.
Segun ken ni Ortega, mapagkokonektar ti sibubukel nga istorya ken kinapudno no sadinno ti nakaikabilan ti kwarta nga awan ti resibo na.
Naikeddeng nga agtestigo da Col. Manaros Boransing II ken Col. Magtangol Panopio maipanggep kadagiti sertipikasyon nga insumitir ti Department of Education (DepEd) idi ni Duterte paylaeng ti sekretaryo iti ahensya.
Inpetteng ti agpanpanday linteg a saan a trabaho dagiti soldado ti giggem wenno agibunong ti pondo no di ket mangipaay da laeng ti seguridad.
Inbatad met ni House impeachment team spokesperson Ace Barbers a napateg a maamoan no apay a nairaman dagiti militar ken no inusar laeng dagitoy dagiti politiko.
Inlawlawag met ni Barbers a saan a ti Armed Forces of the Philippines ti pakaiturunga ti panangusig no di ket sungsungbatan paylaeng daytoy ti bise presidente iti saan nga umiso a panangusar ken panang-liquidate ti nasao a pondo.
