LAOAG CITY -Naiget ti panagmonitor ti gobierno lokal iti babaen ti City Disaster Risk Reduction and Management Council iti ciudad ti Batac iti epekto ti habagat.
Kinumpirmaran ni Mr. Arvin Lumang, ti mangidadaulo iti City Disaster Risk Reduction and Management Council iti ciudad ti Batac, ti pannakalayos ti paset ti Barangay Ricarte iti nasao a ciudad gapu iti panagtudtudo na nga epekto ti habagat.
Inpakaammo na a ti kaadalem ti danom iti nasao a barangay ket umabot iti labes ti tumeng ti tao isut gapuna a nagtignay da a dagus tapno alisto nga ages-es ti danom.
Inbatad na a kalpasan a naikkat dagiti nakaabbeng kadagiti water waste iti nadakamat a barangay ket alisto metten ti panages-es ti danom.
Innayon na a dua a backhoe ti nausar tapno mangikkat kadagiti nakaabbeng kadagiti water waste iti lugar.
Kabayatanna, inpasigurado ni Lumang a nakasagana ti lokal a gobierno iti ciudad ti Batac iti panangidaulo ni Mayor Markee Chua para iti pannakaipaay ti tulong kadagiti possible a maapektaran ti kalamidad, ken nakasagana aminen dagiti kasapulan nga equipment ken ti nagduduma nga ahensya ti gobierno no adda dagiti kasapulan a maibakwit.
