LAOAG CITY –Inusar ti House prosecution panel “layman” spokesperson ken Lanao del Sur 1st District Rep. Zia Alonto Adiong ti simple a matematika tapno maipakita ti sakop ti maipagarup nga irregularidad iti pannakausar ti ₱125 milion a confidential funds ti Office of the Vice President (OVP).
Segun kenni Adiong, nausar ti OVP ti ₱125 million a confidential funds iti uneg laeng ti 11 nga aldaw idi Disiembre 2022.
Naawat ti OVP ti ₱125-milion a cash advance idi Disiembre 2022 ken naipadamag nga inusarna ti intero a gatad manipud Disiembre 21 agingga 31. Immunan a nakuestionaran ti state auditor Roderick Wamil gapu ta dagiti pondo ket nailatang para iti maikapat a kuarter.
Pinagduaduaan pay ti prosecution ti panangilawlawag ti Office of the Vice President (OVP) maipapan kadagiti naaramid a gastos sakbay a nairuar ti kuarta.
Masdaaw ni Adiong no kasano a naiwaras ti pondo iti 134 a lokasion iti intero a pagilian iti las-ud laeng ti 11 nga aldaw.
Nagbalin a sentro ti Article 1 ti impeachment case ti 11 nga aldaw a panaggasto bayat a suksukimaten ti prosekusion no kasano a nakiddaw, nai-withdraw, ken na-liquidate ti umuna a ₱125-milion a tranche.
Impasingked ni Adiong a napateg dagiti opisial a dokumento iti pananghusga kadagiti palawag dagiti opisyal ti Office of the Vice President (OVP).
Pinagduaduaan pay ni Adiong no mapagtalkan ni Bise Presidente Sara Duterte iti panagusar iti pondo ti publiko, nangruna iti panangsurot kadagiti pagannurotan para iti confidential funds.
Para ken ni Adiong, ti mapapati a panaglabsing kadagiti kangrunaan a panangsalaknib iti panagusar ti confidential funds ket adda pakainaiganna iti panagsungbat ni Duterte kas maysa nga opisial ti gobierno.
