LAOAG CITY – Kiniddaw ni Senate Minority Leader Alan Peter Cayetano iti economic team ti gobierno nga ipakitada no mano ti nagastos iti 2026 national budget, no napanan dagiti pondo, ken no mano ti nabulod ti pagilian, sakbay a mangrugi ti Senado iti deliberasion maipapan iti 2027 budget.
Iti suratna ken ni Senate Finance Committee Chair Sen. Joseph Victor “JV” Ejercito, kinuna ni Cayetano a napateg ti datos tapno agbalin a transparent ti proseso ken masigurado a maitunos ti budget kadagiti inkari a prioridad ti gobierno.
Kiniddaw pay ni Cayetano iti Department of Budget and Management (DBM) ti detalye no mano ti nairuar, nailatang kadagiti proyekto, ken aktual a nabayadan ti 2026 budget. Kayatna pay a maammoan ti kabaelan ti tunggal ahensia a mangbusbos iti pondo wenno absorptive capacity-na.
Mainaig iti daytoy, kiniddawna pay ti impormasion maipapan iti pannakaaramat ti UPLIFT (Unified Package for Livelihoods, Industry, Food, and Transport), ti dagup nga utang ti pagilian agingga idi Hulio 31, 2026, baro a pautang ken bonds iti napalabas a tallo a tawen, ken foreign loans ken grants nga agur-uray pay laeng iti pannakaaprobarna.
Kiniddaw pay ni Cayetano ti pannakaanalisar dagiti pondo a nayakar wenno re-allign, nainayon kadagiti dadduma a programa manipud idi Hulio 2023, agraman ti nagtaudan ken nakaipananna.
Innayonna pay ti nasapa a panangisubmitir dagiti ahensia kadagiti dokumento tapno adda umdas a panawen dagiti senador a mangadal kadagitoy.
Impanamnama ni Cayetano ti “full and good faith cooperation” na iti pannakabukel ti 2027 budget.
