LAOAG CITY – Impakaammo ti National Disaster Risk Reduction and Management Council (NDRRMC) a dumanon iti 117 a lugar iti Luzon ti nagdeklarar ti state of calamity gapu iti epekto dagiti bagyo a Luis, Maymay, Neneng, ken Southwest Monsoon wenno Habagat.
Maibasar iti datos manipud iti NDRRMC, karaman kadagiti nagdeklara ti sibubukel a probinsia ti Benguet, Bataan, Bulacan, Pampanga, Zambales ken Cavite.
Kasta payen ti Dagupan; Santa Barbara, Bugalion ti Mangaldan, Mangatarem iti Pangisinan; ken ti Rodriguez (Montalban) idiay Rizal, Nasugbu, Batangas ken Sablayan, Paluan, ken Abra de Ilog iti Occidental Mindoro.
Umabot met iti 8 milion nga indibidual wenno katukad ti 2.3 milion a pamilia ti nairekord a naapektaran iti nadakamat a kasasaad ti paniempo ken 32 ti nairekord a pimmusay.
Kabayatanna, agarup 3 ribo met a pagtaengan ti nairekord a nadadael, 6.11 bilion a pisos ti balor ti pannakadadael ti imprastruktura ken 2.32 bilion a pisos ti balor ti pannakadadael ti agrikultura.
