LAOAG CITY – Ginutigot ni Ombudsman Jesus Crispin Remulla iti Supreme Court (SC) nga ad-adda a bantayan ti judicial system, nangruna dagiti kaso dagiti tattao a nasentensiaan iti graft ngem maipaayan latta ti piyansa babaen kadagiti nababbaba a korte.
Segun kenni Remulla, rumbeng a kitaen ti Supreme Court (SC) no apay nga umabot ti tawen dagiti kaso ti graft ken corruption, wenno uray pay dekada, tapno mausig iti Sandiganbayan ken Regional Trial Courts (RTCs).
Kiniddawna pay iti Supreme Court (SC) ti umno a panang-monitor kadagiti kaso ken mangikeddeng kadagiti deadline tapno maiyalisto ti pannakausig.
Iti babaen ti Rules of Court, mabalin a maipaay ti piyansa uray kalpasan ti pannakakonbiktar iti graft wenno panaglabsing iti Anti-Graft and Corrupt Practices Act no saan a madusa iti reclusion perpetua wenno tungpal biag a pannakaibalud.
Kinuna ni Remulla a naasi unay ti dadduma a korte a mangipaay iti piyansa kadagiti nasentensiaanen, gapu ta awanen ti “presumption of innocence” ken karbenganda nga agpiyansa.
