LAOAG CITY – Umabot iti pito a barangay ti nalayos iti ili ti Currimao gapu iti panagtudtudo na nga epekto ti habagat.
Daytoy ti inpakaammo ni Mr. Renato Reyno Jr., ti mangidadaulo iti Municipal Disaster Risk Reduction and Management Office iti ili ti Currimao .
Inbatad na a dagiti barangay nga apektado iti layos ket pakiramanan iti Brgy Pob. 1 a nakaapektaran ti pito a pamilya; San Simeon; Pias Sur (tallo a pamilya); Brgy. Gaang, 2 a pamilya wenno 11 nga indibidual; Maglaoi Norte, 4 a pamilya wenno 11 nga indibidual; Maglaoi Sur, dua a pamilya ken iti Brgy. Lang-ayan, dua a pamilya wenno 7 nga indibidual.
Kunana nga iti agdama ket agtultuloy pay iti consolidation ken monitoring da kadagiti asideg iti coastal areas pakairaman dagiti adda iti nababa a lugar .
Mainaing iti daytoy , kuna ni Reyno nga adda payen iti panagpukaw iti suplay ti kuryente iti Brgy Salugan, Torre, Victoria, San Simeon, ken Sta. Cruz gapu iti pannakaperdi iti transformer ngem insigida metlaeng daytoy a naisubli iti Ilocos Norte Electric Cooperative.
Inpakaammo na nga above normal met paylaeng iti lebel ti danom dagiti karayan pakairaman iti kabaybayan, ken amin met a kalsada ket passable idinto a dagiti communication lines ket operational amin.
Malaksid iti daytoy, inbatad ni Reyno a no maipapan iti agrikultura ket agtultuloy ti consolidation ngem iti agdama ket awan pay iti naireport a nadadael a pagtaengan ken imprastraktura.
Kabayatanna, kunana a nakasaganan dagiti relief goods a maipaay kadagiti naapektaran iti kalamidad a pamilya wenno indibidual iti nasao nga ili.
