LAOAG CITY – Naiget ti panagmonitor ti City Disaster Risk Reduction and Management Council iti agtultuloy a panagtudtudo na ti napigsa nga epekto ti habagat ditoy ciudad ti Laoag.
Inbatad ni Dr. Melvin Manuel, ti mangidadaulo iti City Disaster Risk Reduction and Management Council, addan ti pito a pamilya manipod iti nagduduma a barangay a naibakwit ditoy ciudad ti Laoag idinto a napasamak met ti dua a landslid iti paset ti Barangay Pila.
Segun ken ni Manuel, adda met latta dagiti residente a nagkedked nga agbakwit, gapu ta agtalek da a natalged a pagtalinaedan da ti second floor ti balay da.
Inpakaammo ni Manuel a dagus a nagturong dagiti kameng ti City Engineering Office iti nakapasamakan ti landslide isut gapuna a nawaknitan met a dagus ti lugar.
Inpasingked pay ni Manuel nga ado dagiti nakasagana a foodpacks a maipaay para kadagiti pamilya a naibakwit.
Mainaig iti daytoy, inpakaammo ni Manuel a passable met amin a kalsada ditoy ciudad ti Laoag gapu ta alisto a nages-es ti danom apaman a nagsardeng ti mapaspasaran a tudo.
Kabayatanna, inrakurak ni Manuel a nabalakadan met aminen dagiti mangngalap babaen kadagiti opisyal ti barangay tapno saan da paylaeng a gandaten ti tumappog iti baybay tapno mapan agkalap gapu ta delikado ti panawen.
Innayon na naiget pay ti panagmonitor dagiti kameng ti Philippine Coastguard tapno masigurado nga awan dagiti makalibas a mapan agkalap iti panawen ti kalamidad.
