LAOAG CITY – Ibilang dagiti agpam-panday linteg a “central figure” iti impeachment trial ni Bise Presidente Sara Duterte ti defense counsel-na a ni Michael Poa gapu ta isu ti dati a pannakangiwat ni Duterte iti Department of Education (DepEd).
Agtestigo ni Poa kas prosecution witness iti Senate hearing mainaig iti mapapati a di umiso a pannakausar ti confidential funds iti Department of Education (DepEd) ken Office of the Vice President (OVP).
Kabayatan ti imbestigasion ti House committee idi 2024, kinuna ni DepEd Undersecretary Nolasco Mempin a ni Poa ti nagkiddaw kadagiti military certifications nga inusar ti Department of Education (DepEd)iti panangsungbatna iti audit findings ti Commission on Audit (COA).
Segun kenni House Deputy Speaker Paolo Ortega V, napateg ti testimonia ni Poa gapu ta adda dagiti statement nga inaramidna kabayatan ti 2024 hearing a kasapulan pay laeng a malawlawagan.
Kinuna pay ni Ortega a mabalin a napatpateg ti testimonia ni Poa ngem ni Col. Raymund Lachica, dati a security officer ni Duterte a mapapati a nangala iti confidential funds para kadagiti aktibidad nga imbilin ti bise presidente.
Impetteng met ni Manila 6th District Rep. Bienvenido Abante ti akem ni Poa kas empleado ni Duterte. Kinuestionaranna ti immun-una a palawag ni Poa a dina ammo no kasano a naaramat dagiti confidential funds iti DepEd.
Iti biang ni Poa, kinunana a nakasagana daytoy nga agtestigo ken awan ti plano na nga usaren ti pribilehio ti attorney-client malaksid no kasapulan. Segun ken ni Ortega, nakasaganan ti prosecution no bilang ta usaren ni Poa ti nasao a pribilehio.
