LAOAG CITY – Umaboten iti 5,835 ti nairekord a kaso ti leptospirosis iti intero a pagilian ita a tawen, segun iti Department of Health.
Mainaig iti daytoy, kaadoan kadagiti nakumpirmaran a kaso ket manipud iti National Capital Region nga addaan ti 1,733, bayat a 632 met iti Central Luzon ken idinto a 561 ti nairekord iti Cagayan Valley.
Basar iti kaudian a datos ti Department of Health, ti nairekord a 19 a porsiento a kaso ti leptospirosis ket nababbaba kumparar iti 7,187 a nairekord iti kapada met laeng nga aldaw idi napalabas a tawen.
Malaksid iti daytoy, bimmaba pay ti bilang dagiti natay, manipud 764 idi naudi a tawen ket 385 laengen iti agdama a tawen.
Nupay kasta, agtaltalinaed ti panagballaag ti Department of Health ti saan a panagkampante ti publiko, aglalo iti agdama a mapaspasaran a panaglayus iti sumagmamano a lugar.
Ti leptospirosis ket maysa a bacterial infection a mabalin a maala babaen iti direct contact iti isbo dagiti infected animals, kas iti bao, baboy, wenno kadagiti lugar a kontaminado kas kadagiti danum a naummong kadagiti kalkalsada.
Kabayatanna, binilin ti Department of Education dagiti pampubliko a pagadalan ti naigiget nga information campaign kontra iti dengue ken leptospirosis.
