LAOAG CITY – Marigatan dagiti health authorities iti Central Visayas a maipangato ti bilang dagiti ubbing a mabakbakunaan kontra iti measles ken rubella (MR) gapu iti vaccine misinformation ken panagdudua ti sumagmamano a nagannak.
Segun iti Department of Health iti Central Visayas (DOH-7), 21.7 a porsiento laeng ti target a 630,214 nga ubbing a nabakunaan iti MR Supplemental Immunization Activity (MR-SIA).
Nangatngato daytoy no ikompara iti 15 a porsiento iti napalabas a tawen, ngem adayo paylaeng iti 95 a porsiento a target coverage a kasapulan tapno maaddan ti umdas a proteksyon ti populasyon kontra iti measles.
Agingga idi Agosto 29, umabot paylaeng ti 137,042 dagiti ubbing nga agtawen ti 6 agingga iti 59 a bolan iti Cebu ken Bohol ti nabakunaan idinto a 493,172 ti saan pay a nakaawat ti bakuna ken nagtalinaed a vulnerable kadagiti makaakar a sakit.
Segun kadagiti health official, karaman dagiti kangrunaan a lapped ket ti vaccine hesitancy ken saan nga umiso nga impormasyon, aglalo iti social media.
