LAOAG CITY – Adda ti pakabuklan a 52 a pamilya wenno kaibatugan ti 191 nga indibidual a naapektaran ti layos manipod iti siyam a barangay ditoy ciudad ti Laoag gapu iti agtultuloy a panagtudtudo na ti napigsa nga epekto ti habagat.
Daytoy ti inbatad ni Dr. Melvin Manuel, ti mangidadaulo iti City Disaster Risk Reduction and Management Council ditoy ciudad ti Laoag.
Segun ken ni Manuel, dagiti barangay a naggapwan dagiti evacuees ket iti Barangay 7-B, 29, 35, 36, 42, 44, 49A, 54B, Barangay 2 ken Barangay 57.
Kuna na a manipod iti nasao a bilang ket 10 a pamilya wenno kaibatugan ti 32 nga indibidual ti naikabil kadagiti evacuation center ditoy ciudad ti Laoag, idinto a dagiti dadduma ket nagtalinaed da latta iti bukod da a pagtaengan aglalo dagiti addaan ti second floor ti balayna.
Inpakaammo ni Manuel nga arigna amin dagiti evacuees ket isuda metlaeng dagiti dati a maibakbakwit no adda ti mapasaran a layos.
Nupay kasta, kuna ni Manuel a kalpasan a nagparbeng ti mapaspasaran a napigsa a tudo ket nagawiden dagiti evacuees iti balay da.
Malaksid kadagiti naibakwit, inbatad ni Manuel nga adda pay ti rinespondean da nga uppat a misyonaryo kalpasan a naitapwak ti lugan da a pick-up iti kataltalonan gapu iti kapigsa ti tudo a nangitunda ti pannakalayos iti Barangay Casili ditoy ciudad ti Laoag ket saanen a makita pay iti kalsada.
Innayon na a saan met a nadangran dagiti uppat a misyonaryo ken alisto da a naiyaon ti nagluganan da a pick-up manipod iti kataltalonan.
Mainaig iti daytoy, inpakaammo ni Manuel nga adda ti maysa a balay a partially damaged a nairekord ditoy ciudad ti Laoag a daytoy ket ti natamaan ti alipugpog iti Barangay Apaya.
