LAOAG CITY – Nangiparuk-at ti ballaag ti Office of Civil Defense (OCD) ken dagiti lokal a gobierno iti publiko, partikular kadagiti residente t Metro Manila ken dagiti kaparanget a probinsya nga agannad kontra iti nababa kalidad ti angin nga itunda ti nabengbeng nga haze wenno asok nga aggapo iti forest fires iti Kalimantan, Indonesia.
Segun ken ni Office of Civil Defense Deputy Administrator Assistant Secretary Raffy Alejandro, ti nabengbeng nga asok manipod iti wildfires iti Indonesia ket simrek iti pagilian kalpasan a naguyod ti angin nga agturong iti rehiyon.
Gapu iti daytoy, uray ti sumagmamano a lokal a gobierno ket nangiparuk-at metten ti bukod nga abiso.
Binalakadan ni Caloocan City Mayor Along Malapitan dagiti umili nga agsuot ti face no rumuar iti balay tapno makaliklik ii possible nga epekto ti salun-at kalpasan a nakairekord ti dakes a lebel ti kalidad ti angin iti ciudad ken iti intero Metro Manila.
Basar iti report, nakairekord ti nabengbeng a layer ti haze a nangkalob ti skyline ti Metro Manila a nalawag a nakita manipod iti Antipolo City, Rizal iti oras ti alas-5:48 itay bigat iti daytoy nga aldaw ti Martes, Setyembre 1.
Inlawlawag met ti Department of Environment and Natural Resources–Environmental Management Bureau (DENR-EMB), nga agtultuloy a banbantayan da ti air quality kadagiti apektado a lugar, aglalo iti National Capital Region (NCR), CALABARZON, ken MIMAROPA.
Iti agdama, agtultuloy ti panangtingiting dagiti otoridad iti lebel ti polusyon ken kinabengbeng ti asok tapno madeterminar ken masaganaan ti agbalin nga epekto na iti salun-at ken iti aglawlaw.
