LAOAG CITY – Inbilin ti Department of Education (DepEd) iti amin a pampubliko a pagadalan iti pagilian a paigetan ti panangliklik, monitoring ken reporting ti dengue ken leptospirosis iti baet ti agtultuloy a panagtudo ken panaglayos.
Maibasar kadagiti naiparuk-at nga advisory, pinagtignay dagiti school heads, health personnel ken daddumaa pay nga empleado tapno papigsaen ti sanitation, nasapa a maestablisar dagiti possible a kaso ken dagus a referral iti health facilities.
Para iti dengue, naibilin ti pannakaipatungpal ti Enhanced 4S Strategy ti Department of Health (DOH): search and destroy mosquito breeding sites, secure self-protection, seek early consultation ken support fogging wenno spraying no irekomendar dagiti local health authorities.
Karaman pay dagiti rumbeng nga aramiden ket ti regular nga inspeksyunin ti classrooms, school grounds, garden, comfort room, storage areas, gutters ken drainage systems tapno ikkaten ti naurnung a dnaom a mabalin a pagumukan ti lamok.
Tapno makaliklik met iti leptospirosis, maipawil kadagiti estudyante ti saan a panaguper, panaglangoy wenno pannagna iti danom a naurnung gapu iti layos ken napitak a lugar.
No saan a maliklikan ti exposure, naibalakad ti panagusar ti botas, panangkalob kadagiti sugat ken panangugas a dagus ti kudil usar ti nadalos a danom ken sabon.
