LAOAG CITY – Naglikudan ni Barangay kagawad Karen Martin iti Brgy. 21, San Pedro ditoy ciudad ti Laoag ti akusasyon a kanayon a mabenbenipisyaran dagiti kameng ti pamilya na kadagiti nagduduma a financial assistance program a maipapaima iti barangay da.
Segun kenkuana, dumaldalan iti umno a proseso ti pannakapili dagiti maikabil iti listaan a benepisyaryo iti nagduduma a programa ti gobierno.
Inadmitir na nga adda dagiti kameng ti pamilya na a nakaawat ti tulong kas iti anak na, ama ken ina na.
Nupy kasta, inlawlawag na a dagitoy ket kwalipikado kas maibasar kadagiti pagannurutan a sursuruten da para iti rumbeng nga agbalin a benepisyaryo.
Innayon na pay a saan met a kanayon a maipaayan ti tulong pinansyal dagiti kameng ti pamilya na.
Kunana pay a limitado laeng ti slot isut gapu na nga ar-aramiden amin a kabaelan na tapno maipaayan amin ti gundaway a makaawat ti tulong dagiti amin a pamilya iti barangay da.
