LAOAG CITY – Nakaawat ti zero budget ti Department of Education (DepEd) para iti panag-hire kadagiti baro a mangisursuro iti tawen 2027.
Kinuna ni DepEd Secretary Sonny Angara iti House Committee on Appropriations a para iti sumaruno a tawen, ti kinakurang ket 14,274 a mangisursuro, nga aggatad iti agarup P4.29 bilion.
Nupay kasta, inlawlawag ni Angara a mangala ti DepEd kadagiti baro a mangisursuro ita a tawen, ad-adu ngem iti gagangay a bilang.
Innayonna nga adda pay laeng ti agarup a 100,000 nga agur-uray ken maikari kadagiti promosion nga agur-uray pay laeng iti available a pondo.
Malaksid kadagiti kanayonan a mangisursuro, ti naisingasing a budget ti Department of Education (DepEd) iti 2027 iti National Expenditure Program (NEP) ket karaman ti ₱801.5 milion para iti panangawat iti 1,800 nga school counselor associates ken 221 a schools division office counselor.
