LAOAG CITY – Immuli iti US$104.8 billion ti Gross International Reserves (GIR) ti pagilian iti bulan ti Agosto 2026, segun iti Bangko Sentral ng Pilipinas (BSP).
Basar iti Bangko Sentral ng Pilipinas (BSP), agtaltalinaed a natibker ti lebel ti pondo tapno masuposupan ti kasapulan ti pagilian iti panagangkat kadagiti produkto, panagbayad kadagiti utang ken kas proteksion iti aniaman a pannubok iti karit ti ekonomiya a mapaspasaran ti intero a lubong.
Impakaammo ti ahensia a ti naruay a panagngato ti pondo ket gapu iti panangngato ti presio ti balitok iti merkado a nangitunda ti upward valuation ti gold holdings ti BSP, karaman pay kadagiti ganansia a naala ti bangko sentral manipud iti panangpuuanda iti ruar ti pagilian.
Mainaig iti daytoy, ti agdama a lebel ti Gross international reserves ket makaanay tapno masuposupan ti agingga 6.8 a bulan a gatad ti panagangkat kadagiti produkto ken serbisio ti pagilian.
