LAOAG CITY – Inlawlawag ni Brgy. Chairman Manny Morales iti Barangay 1, San Lorenzo ditoy ciudad ti Laoag a naiget ti panangsurot da iti guidelines iti panagpili da iti lima a benepisyaryo para iti PBBM scholarship grant iti barangay da.
Kuna na nga adda ti 20 a graduating students iti kolehiyo iti barangay da ngem 17 laeng dagiti nagaplikar, ngem inarisit da a naimbag babaen iti panangkita da a naimbag kadagiti dokumento nga insubmitir dagiti da.
Inbatad ni Kapitan Morales a dagiti nagibasaran da iti panagpili ti lima a benepisyaryo ti PBBM Scholarship Grant ket masapol a dagitoy ket awan pulos ti nakairamanan da nga scholarship grant, agngangabit a saanna a maituloy ti panagadal no awan ti tumulong kenkuana ken aggapo iti indigent a pamilya nga isuna laeng ti kaunaan a makaturpos paylaeng iti pamilya da a mabalin a makatulong no maileppas na ti panagadal.
Inpakaammo pay ti kapitan nga inpalagip na kadagiti pada na nga opisyal ti barangay a saanda koma nga iraman dagiti kabagyan wenno asideg kadakuada para iti makunkuna a “delicadeza” ken tapno awan ti agbalin nga isyu iti panagpili da iti lima a benepisyaryo ti PBBM Scholarship Grant.
Innayon na nga iti sumaruno a lawas ket ipublikar dan ti listaan dagiti pinal a benepisyaryo ti programa a makaawat ti sag-20 ribo a pisos a dakkel a makatulong iti panagadal da iti kolehiyo.
Reaksyon daytoy ni Kapitan Morales kalpasan nga adda dagiti reklamo kadagiti dadduma a barangay a maipagarop a dagiti asideg kadagiti opisyal ti barangay ti napili a benepisyaryo ti PBBM Scholarship Grant.
