LAOAG CITY –Impakaammo ni Atty. Kidd Castro, maysa a Criminal Law Professor nga agtalinaed a nabara a saritaan ti voting threshold iti impeachment court gapu ta ado dagiti saludsod manipud ti publiko ken senator-judges iti panagbubutos para iti pannakakonbiktar ni Vice President Sara Duterte.
Kunana nga inimbitaran ti Senate impeachment court dagiti nagduduma a Retired Chief Justice a pakairamanan da Retired Chief Justice Artemio V. Panganiban, Reynato S. Puno, Hilario G. Davide Jr. ken Retired Associate Justice Adolfo S. Azcuna, tapno ilawlawag iti pakasaritaan ti voting threshold ken maipaayan ti naan-anay nga interpretasion iti proseso ti panagbubutos dagiti senador iti panangusig.
Inbatadna a napateg ti panagkiddaw ti opinion kadagiti dati a chief justice gapu ta ti voting threshold no sadinno a kasapulan ti two-thirds vote wenno saan a bumaba iti 16 a butos dagiti senador ti agdesision no maaddaan ti conviction ni Vice President Sara Duterte.
Para ken ni Castro, saan laeng a simple a saritaan daytoy nudiket saritaan ti umno nga interpretasion ti linteg tapno masigurado a lehitimo ken awan ti maris ti personal nga interes ti agbalin a desision ti impeachment court.
Mainaig iti daytoy, iti surat ni Sen. Rodante Marcoleta a nakapalaon ti kalikagumna nga agbutos iti impeachment, kunana nga adda ti compelling power ti Senate Impeachment court ti panagdesision pakairamanan no siasinno ti agbutos ken no ana dagiti kondision.
