LAOAG CITY – Impakaammo ni Senator Alan Peter Cayetano a nagturong da ken ti pamiliana idiay Singapore tapno aginana bayat ti ado a saludsod ti no ana ti rason ti panagturong da ti ballasiw-taaw.
Iti Facebook live ni Cayetano, kunana a pribado ti panagpasiar da ken awan ti rason tapno saan da a makatalaw ti pagilian.
Mainaig iti daytoy, ado ti nakakita kadagiti agkabsat a Cayetano ti isasangpet da iti Ninoy Aquino International Airport ti agsapa ita nga aldaw, Setiembre 13.
Kunana a nakigtot daytoy a nagbalin nga isyu ti inladawanna kas ‘routine, quiet, and short’ a panagbakasionda no sadinno nga impettengna ti ngumatngato a ‘toxic’ political environment iti pagilian a nalaka nga agaramid dagiti umili ti kontrobersia.
Kunana a dagiti pangta a kasona, agdama nga imbestigasion, ken agbalbaliw nga akusasion ket paset laeng ti kalikagum a mangilaban iti pagilian.
