LAOAG CITY – Inlawlawag ni Barangay Chairman Sydney Ramos iti Barangay 33, Cabulalaan iti ili ti Bacarra ti ordinansa nga inadaptar ti barangay da manipod iti lokal a gobierno iti nasao nga ili mainaig iti pannakaipataw ti multa kadagiti maduktalan a saan nga agitali wenno mangibulos lattan kadagiti taraken da.
Segun iti kapitan, ti 1st offense ket P300, 2nd offense P500 ken ti 3rd offense ket saan a nababbaba ngem P1,000, ngem agpapan kadagitoy ket awan pay ti namulta a kabarangayan da.
Inbatad na a regular ti panangipatungpal da ti general assembly ken ditoy a mapalagipan dagiti kabarangayan da mainaig iti panagbalin a responsable a pet owner.
Nupay kasta, inadmitir ti kapitan a ti laeng problema ket awan pay ti na-deputize da nga agtiliw ken awan ti pakaipupukan dagiti walang nga ayop a matiliw iti barangay da.
Immuna iti daytoy, adda ti naidanun a reklamo iti Bombo Radyo Laoag mainaig ti maipagarop a kaado dagiti walang nga aso iti nadakamat a barangay a mabalin a pakaitundaan ti disgrasya dagiti motorista ken makagat dagiti aglabas a tattao.
