LAOAG CITY – Makaawat ti disability support allowance dagiti 150 nga ubbing nga adda ti rangkap ti bagina ditoy siudad ti Laoag babaen ti Project Aruga ti Department of Social Welfare and Development (DSWD).
Segun kenni Ms. Rachel M. Granados, Social Welfare Officer II, Social Technology Section Head / DSWD Field Office I, daytoy ket paset ti pilot implementation ti Project Aruga a mangted iti tulong para kadagiti medical ken therapy-related a gastos dagiti ubbing a Persons With Disability.
Kunana a napili dagitoy a benepisyaryo babaen iti Persons with Disabilities Affairs Office babaen iti sumagmamano a nagibasaran kas iti klase ti disability ken kasasaad ti panagbiag.
Naiprayoridad met dagiti ubbing nga adda mental ken psychological needs, ken dagiti pamilia a maibilang kadagiti kasapulan unay iti tulong.
Karaman iti aktibidad ti Handog ng Pangulo ti CareVan a naipaay babaen iti National Council on Disability Affairs (NCBA ) iti pannakikaykaysa iti DSWD Field Office 1.
Iti CareVan, ma-assess dagiti ubbing a PWD ken mai-refer da kadagiti therapy center wenno ospital a mangipaay iti kasapulan da a pagdalanan.
Ti CareVan ket saan a cash ti ipaay da a suporta no di ket direkta a sessions iti therapy center, a maibasar iti resulta ti assessment dagiti social worker ken health professionals.
Kabayatanna maragsakan ni Konsehal John Michael Farinas, ti Chairman ti Committee on family welfare and Children gapu ta dakkel a makatulong daytoy a programa kadagiti pamilya nga adda ti miembro na a Person with Disability.
Inbatad na a kas maysa a nagannak ti Person With Disability, ammona ti rigat ti mangpadakkel, mangisuro, mangaywan ken mangtaripato kadagiti addaan ti rangkap ti bagina.
Kunana a babaen iti daytoy a programa keet saan laeng a pinasial a tulong ti maited no di ket maisuro kadagiti mangay-ayawan wenno nagannak dagiti Persons with Disability iti usto a panangaywan kadagitoy.
Maipalagip nga iti rehiyon Uno ket ti paylaeng ciudad ti Laoag ti nangrugi iti pilot implementation ti Project Aruga, agraman ti panangipapaay iti disability support allowance kadagiti napili a benepisyaryo.
