LAOAG CITY – Naikairekord ti Provincial Disater Risk Reduction and Management Council (PDRRMC) ti agarup 3,600 a pamilia ditoy probinsia a naapektaran iti kalamidad kas ti nakaro a panagtudo ken ti epekto ti naglabas a bagyo Pilandok.
Segun ken ni Governorn Cecilia Araneta Marcos, a daytoy ket katukad ti nasurok 10,200 a kailian manipid iti 119 a barangay iti probinsia.
Kunana a daytoy ket basar iti kaudian nga inpormasyon a naawatna manipud Provincial Disater Risk Reduction and Management Council (PDRRMC).
Mainaig iti daytoy, umabot metten ti 69 a milyon a pisos dagiti nadaddadael iti benneg ti agrikultura, 68 a milyon a pisos met iti benneg ti infrastraktura no sadinno a pakabuklan ti 137 a milyon a pisos ti nadadael gapu iti kalamidad.
Inlawlawag ti gobernador a kangrunaan a makagapo kadagiti nadadael ket gapu iti panagreggaay ti daga ken layus kadagiti “slope protection structures”.
Pakairamanan kadagiti nadadael ket ti sumagmamano a paset ti national, provincial ken municipal road nangruna kadagiti asideg dagiti wenno kadagiti spillway.
Kabayatanna, impakaamo ni Marcos nga addan dagiti sumagmamano a lugar a nagibunongan ti Provincial Government of Ilocos Norte (PGIN) ti food pack kas iti siudad ti Laoag, siudad ti Batac, ili ti Paoay, San Nicolas ken Vintar.
