LAOAG CITY – Impetteng ni retired Chief Justice Artemio Panganiban iti Senado a ti hustisia ti namnamaen dagiti umili kadakuada.
Daytoy ti sungbat ti dati a Chief Justice ti Korte Suprema nga adda pay laeng iti isyu ti voting threshold para iti pannaka-convict ni Bise Presidente Sara Duterte (VPSD) a sumangsango iti impeachment trial.
Impaganetget ni Panganiban nga iti mata ti umili, manamnamaenda ti hustisia kadagiti senador-judges ken saan a maipapan iti legalismo ken judicial connduct.
Kinunana a saan a maseknan dagiti umili no siasino ti mangipapaay iti hustisia ken saanda a maseknan no mano ti bilang dagitoy.
Innayon ni Panganiban a saan a napateg iti umili ti isyu ti legalidad ken ti napateg nga aramiden ti Senado ket ti pannakaipaay iti kinapudno ken panagbalin a patas.
Kinunana nga uray manmano laeng dagiti senador-judge, no makaipaayda iti hustisia a kalikaguman dagiti umili, maibilang nga nagballigida iti pannakaipaay ti serbisioda kadagiti kailianda.
