LAOAG CITY – Impakaammo ni Ms. Marie Jane Rayos, a dandanin matinnag iti derraas ti pagtaenganda iti Brgy.52-B Lataag ditoy siudad ti Laoag gapu iti nakaro a panagtudona nga epekto ti habagat wenno Southwest Monsoon.
Kunana a kellaat a naggedday ti daga nga adda iti likod ti pagtaenganda.
Segun kenkunana, adda laeng ti babassit a rikki ti daga a makitada idi ngem gapu iti nakaro a pnagtudona ket ditoy a naggedday ti daga.
Ti kinakaro ti panaggedday ti daga ket naapektaran ti koneksion ti septic tank ti cr-da.
Insigida met nga nagkiddawda ti tulong ken impakaammo da ti napasamak iti sitio kagawad no sadinno nga inpanamnama met daytoy ti panangiwayatda ti inspeksion.
Mainaig iti daytoy, naamoan a naipadanonen iti City Government of Laoag ti napasamak iti babaen ti panangi-refer ni kapitan.
Innayon ni Rayos a kalikagumda ti insigida a tignay ti lokal a gobierno tapno maisalbar ti nagpundaranda nga agassawa.
