LAOAG CITY – Umapela ni Governor Cecilia Araneta Marcos iti naan-anay a panagkaykaysa a manglapped iti iyaadu dagiti kaso ti dengue ditoy Ilocos Norte.
Daytoy ket kalpasan nga addan ti maysa a nairekord a pimmusay ditoy probinsia manipud iti nasao a sakit.
Basar iti kaudian a datos ti Provincial Epidemiology and Surveillance Unit (PESU), immaboten ti 1,858 a kaso ti dengue ti nairekord ditoy Ilocos Norte manipud Morbidity Week 1 agingga ti Week 36.
Naammoan a karaman ditoy ti 108 a baro a kaso, ken ti maysa a pimmusay iti Morbidity Week 36.
Mainaig iti daytoy, nagpanawagan ni Governor Marcos iti panagkaykaysa dagiti kakailian a mangipatungpal kadagiti addang tapno malapdan ti panagadu ti kaso.
Dinakamatna ti pammalagip ti Department of Health wenno DOH nga “”Alas Kwatro na, tayo na mag-Taob, Taktak, Tuyo, Takip!”
“Taob” – Baliktaden wenno ikkaten dagiti pagyanan ti danum a pagitlogan dagiti lamok.
“Taktak” – Taktaken ken dalusan dagiti amin a banbanag a mabalin a pagurnongan ti danum.
“Tuyo” – Siguraduen a namaga ken nadalos ti aglawlaw tapno saan a pagyanan dagiti lamok.
“Takbo” – No adda sintomas ti dengue kas iti agnanayon a gurigor, nakaro a sakit ti ulo, wenno panagbakwar, mapan a dagus iti kaasitgan a health facility.
Inulit ni Governor Marcos ti takder ti DOH a ti pannakasalaknib ti probinsia kontra iti dengue ket responsibilidad ti tunggal maysa.
